Ачык баарлашуу форматында өткөн бул жолугушуулардын максаты - парламент менен жарандык коом өкүлдөрүнүн ортосундагы өз ара кызматташууну талкууга алуу. Бул тууралуу Жогорку Кеңештин басма сөз кызматы маалымдап, аталган иш-чаралар жакынкы күндөрү өтөөрүн билдирген. Маалыматка ылайык, төрага Ахматбек Келдибеков массалык маалымат каражаттардын жана бейөкмөт уюмдардын жетекчилери, жарандык коом өкүлдөрү менен жолугушмакчы. Төрага мындай баарлашуулар парламентке өтпөй калган саясий партиялардын лидерлери менен да болоорун билдирген. “Бул партиялар өлкөнүн саясий турмушуна активдүү катышуусу абзел. Талаш-тартыштар көчөдө эмес, парламенттин ичинде өтүүсү шарт”, - деп белгилейт А. Келдибеков. (ES)
