Жаңы Зеландиянын өкмөтү Крайстчерч шаарындагы зилзалада набыт болгондордун саны 113кө жеткенин жана дайынсыз жоголгондор тирүү табыларына ишеним өтө аз экенин билдирди. Жарандык коргонуу министри Жон Картердин 25-февралда билдиришинче, урандылардын астынан акыркы ирет тирүү адам 23-февралда табылган. Ырасмий маалымат боюнча, 22-февралдагы 6,3 баллдык жер тербетүүдө жоголгон 200дөн ашуун адамдын тагдыры дале белгисиз. Алардын арасында Крайстчерчте англис тилин үйрөнүп жүргөн Жапония, Кытай жана башка Азия өлкөлөрүнөн келген студенттер бар.
