Президенттик кызматын өткөрүп бергенден кийинки тагдыры тууралуу "Азаттыктын" суроосуна жооп берип, президент Отунбаева Кыргызстан жана кыргыздар жөнундө мүлдө дүйнөгө тарай турган китеп жазуу тилеги бар экенин билдирди. "Нью-Йорктобу, Лондондобу, башка жердеби Кыргызстан тууралуу биздин жерге бир жолу келип кеткен, же бир айча жашай калган адамдар жазышат. Алар биздин өлкөнү терең билеби? Кыргызстанда эмне процесстер жүрүп жатат, кыргыздар кандай эл? - ушул тууралу терең китеп жазгандын өзү революция болоор эле. Менин ошондой бир тилегим, кыялым бар", - деп сырын ачыктады мамлекет башчысы.
