Казакстандын батышындагы Ак Төбө дубандык соту төрт адамды террорчу деп тапты. Соттун басма сөз кызматчысы Гүлнур Симатованын билдиришинче, эки айыпкер өмүр бою эркинен ажыратылса, дагы экөө 14 жылдан түрмөгө кесилди. Сот аларды быйыл июль айында коопсуздук кызматтары менен атышууга катышкан деп тапты. Аткылашууда коопсуздук кызматынын бир мүчөсү набыт болгон. Бийликтер май айында жанкечти дубандык администрация алдында бомба жардыргандан кийин шектүү террорчуларды издей баштаган.
