Израилдин Жогорку Соту мурдагы президент Моше Кацавдын апелляциялык арызын канааттандырган жок. Ал зордуктоо фактысы боюнча айыпталып, былтыр декабрда 7 жылга түрмөгө кесилген. Окуя Кацав министр болуп турган кезде болгон. Ал эми президент кезинде 2000-2007-жылдар аралыгында дагы эки аялга сексуалдык ыдык көрсөткөн деп айыпталган. 65 жаштагы Кацав 7-декабрдан тарта жаза мөөнөтүн абакта өтөй баштайт.