Өлкөдө орун алып жаткан салгылашуулардан качкан сириялыктар кошуна өлкөлөрдөн баш калка издеп жатышат. Шаршембиден бери Ливанга Сириядан 20 миңдей киши агылды. Ливандын социалдык маселелер боюнча министри Ваэл Абу Фаур соңку 24 саат ичинде эле Ливан менен чек арадан Дамасктан бери келген 8 жарым миңге жакын качкын өткөнүн маалымдады. Анын айтымында, Ливан өкмөтү аларды мектеп имараттарына жайгаштырат. Качкындарга араб өлкөлөрүнөн гуманитардык жардам келүүдө.
