Пакистандын Хайбер Пахтунква провинциясында ишемби - жекшемби күндөрү өткөрүлгөн операция маалында 10 согушкер жок кылынган. Алардын ичинде бир кыргыз, бир өзбек, төрт чечен, бир дагестандык жана үч пакистандык согушкер бар. Бул жөнүндө провинциянын маалымдоо министри Миян Хусейн бүгүн жар салды. Согушкерлерге каршы операция ишемби күнү Пешавардагы аэропортко кол салуудан кийин өткөрүлгөн. Борбор Азия өлкөлөрүнөн барган согушкерлер Пакистандын түндүк батышындагы уруулар башкарган аймакты 2001-жылдан бери конуш кылган Өзбекстан ислам кыймылы жана Ислам жихады уюмунун негизги бөлүгүн түзөт.
