Орусия Абхазия менен Түштүк Осетиянын эгемендигин тааныгандан кайтпайт

Бул жөнүндө орус тышкы иштер министри Сергей Лавров RTV телекомпаниясына маегинде сүйлөгөн. Ошол эле учурда Лавров азыркы грузин премьери Бидзина Иванишвилинин өкмөтүнүн прагматикалык саясатын колдой турганын да кошумчалады.

Орусия 2008-жылдын августунда Грузия менен болгон кыска мезгилдүү согуштан кийин Грузиянын сепаратисттик региондору – Абхазия жана Түштүк Осетия республикаларынын – Тбилисиден көз карандысыздыгын тааныган. Эми Лавров “ошол чечим кайра каралбайт” деп билдирип жатат. Кечээ грузин премьери Бидзина Иванишвили журналисттерге сүйлөп, жакын арада президент Михаил Саакашвили 2008-жылкы согуш боюнча суракка тартылышы мүмкүн экенин билдирген.