Жумгал районунун Көк-Ой айыл аймагынын тургундары райондук администрациянын алдына боз үй тигип, митингге чыгышты. Алар өкмөттүн кайра бөлүштүрүү фондуна жана Көк-Ой айылына тиешелүү үлүш жерлерин кайрадан тактап, жери жок тургундарга бөлүп берүү талабын койууда.
Бул тууралуу "Азаттыкка" нааразылык акциясына катышып жаткан Көк-Ой айылдык кеңешинин төрагасы Мурат Кыргызбаев билдирди. Анын айтымында, учурда 60тай адам чогулуп турат. Нааразылык акциясы кечээ да болгон. Талаптар аткарылмайын митинг улана берери айтылууда. (Tsh)