Иранда 16 "козголоңчуну" дарга асышты

Иранда 14 чек арачынын өмүрүн алып кеткен чабуулга жооп иретинде 16 "козголоңчуну" дарга асышты. Пакистан менен чек арага жакын жерде болгон кечээги күнкү ок атышууда ошондой эле 5 киши жараат алган.

Систан-Балучистан чөлкөмүнүн башкы прокурору Мохамад Маризехтин айтымында, Занедан түрмөсүндөгү 16 козголоңчу бүгүн эртең менен дарга асылды. “Карапайым адамдарга же коопсуздук күчтөрүнө каршы кол салуулар жоопсуз калбасын эскертебиз”, – деди прокурор.

Чек арадагы окуяга ошол козголоңчулардын тиешеси бар-жогун ал тактаган жок. Ички иштер министринин орун басары Али Абдоллахи жоокерлер буктурмага кабылганын, үчөө туткундалып, Пакистанга алынып кеткенин билдирди. Буга чейин 17 чек арачынын окко учканы маалымдалган.