Чек арада тажик айылдарынан да эл чыгып кетүүдө

11-январда атышуу болгон кыргыз-тажик чек ара тилкелеринде орун алган тажик айыл тургундары да үй-бүлөлөрүн коопсуз жайларга көчүрүп чыгып кетишүүдө. Бул тууралуу Тажикстандын “Азия плюс” маалымат агенттиги Исфара районунун Хожайло айылынын тургундарына таянып жазышкан.

Бүгүн Ак-Сайда тажик-кыргыз чек арачыларынын ортосунда ок атышуу болуп, кыргыз тараптан 5 чек арачы, бир милиция кызматкери, тажик тараптан 3 чек арачы жарадар болушкан.

Ок атуу боюнча эки тараптын расмий бийликтери чагымчылдыкка бири-бирин күнөөлөөдө.

Өткөн жылдын 17-декабрында Ак-Сай айылынын тургундары менен Тажикстандын Ворух анклавынын жашоочуларынын ортосунда тиреш орун алып, аксайлыктар Ворухка кетчү жолду бууп, бийликтен Тажикстандын Чорку айылын айланып өтүүчү жол куруп берүүнү талап кылышкан.

7-январдагы Дүйшөмбү шаарындагы эки тараптуу сүйлөшүүлөрдөн соң кыргыз-тажик чек арачылары талаштуу аймактарды биргеликте кайтаруу чечимине келишкен болчу. Алгачкы биргелешкен көзөмөл 10-январда башталган. (SA)