Бириккен Улуттар Уюмунун Баш катчысы оогандарды 5-апрелде өткөн президенттик шайлоого катышканы менен куттуктап, Ооганстандагы шайлоону "тарыхый" жана "маанилүү кадам" деп сыпаттады. Пан Ги Мун өлкөнүн биринчи демократиялык бийлик алмашуусуна коркутууларга карабай катышкан оогандарга ыраазылыгын билдирди. Ишембиде өткөн добуш берүүгө катталган 12 миллион шайлоочунун 7 миллиону катышты. Алдын ала жыйынтык 24-апрелде уктурулуп, 14-майда расмий жыйынтыгы жарыяланат. Эгерде бир дагы талапкер 50 пайыздан ашык добуш албаса, президенттик шайлоонун экинчи айлампасы 24-майда өтөт.
