Африканын чок ортосунда жайгашкан Руанда өлкөсүндө 100 күнгө созулган геноциддин 20 жылдыгы эскерилди. Кыргында 1994-жылы өлкөнүн көпчүлүк калкын түзгөн хуту уруусу 800 миңдей тутси элин өлтүргөн. АКШнын президенти Барак Обама кыргында жаны кыйылгандарды эскерип, руандалыктардын эски жарааттарды айыктырууга кылган аракеттерин жана экономикалык өсүштү мактоого алды. Борбор калаа Кигали шаарында өтчү расмий эскерүү жөрөлгөсүнө Бириккен улуттар уюмунун баш катчысы Пан Ги Мун катышары күтүлүүдө.
