Бишкек шаардык кеңеши калаа башчысы Кубанычбек Кулматовдун шаарды 2014-2018-жылдар аралыгында социалдык-экономикалык жактан өнүктүрүү долбоорун кабыл алды. Шаардык депутаттар Кулматовдун программасында долбоорлорду каржылоо булактары так көрсөтүлбөгөнүн сынга алганы менен мурдагы кемчиликтер жоюлганын айтып колдоого алышты. Мэр “Азаттыктын” суроолоруна жооп берип жатып:
- Мэр болгондон берки 6 ай мэриянын ички иштери менен алек болууга кетти. Эми өнүктүрүү долбоору кабыл алынып, шаарды кардиналдуу өзгөртүүлөрдү баштайбыз. Шаарга инвестиция тартылып, жолдор оңдолуп, инфраструктура жакшырат. Муну шаардыктар жакын арада сезе баштайт, - деди
Шаардык кеңеш 15-майда мэрдин өнүктүрүү программасын толук иштеп чыгуу үчүн артка кайтарган эле. Кулматов мэрлик кызматты 15-январдан бери аркалап келет. (UEz)
