«XXI кылымдын жаштары. Дебат жана медиа продукция чыгаруу» семинарына Кыргызстан, Өзбекстан, Тажикстан жана Казакстандын түрдүү аймактарынан 40 улан-кыз чогулган. Бул тууралуу иш-чаранын уюштурган Эл аралык билим берүүчү дебат бирикмесинин Борбор Азиядагы бөлүмүнүн (IDEA-CA) медиа-координатору Айзада Токтогулова “Азаттыкка” билдирди:
- Төрт мамлекеттин жаштарын бириктирген семинар 20-июлда Ысык-Көлдүн Чолпон-Ата шаарында башталган. Эки апталык иш-чарада жаштар өз мамлекетиндеги кайсы бир маселени чечүүгө салым кошуучу медиа-продуктуларды даярдоону үйрөнүшөт.
Семинардын жүрүшүндө катышуучулар жарандык журналистика, репортаж даярдоо жана дебат боюнча теориялык маалымат алып, аны иш жүзүндө колдонушат. Ар бир окуучу семинардын жыйынтыгында өзүнүн медиа-долбоорун түзөт. (SE)