Пакистандын борбору Исламабадда полиция менен демонстранттардын кагылышынан бир адам мерт кетип, кеминде 175 адам жараат алды. Өкмөткө каршы чыккан демонстранттар премьер-министр Наваз Шарифтин резиденциясына кирүүгө аракет кылганда полиция көздөн жаш агызчу газ жана желим окторду колдонду.
Оппозициялык саясатчылар Имран Хан жана Тахир ул-Кадринин тарапкерлери 15-августтан бери Пакистан борборунда өкмөттүн кызматтан кетишин талап кылып, митинг өткөрүп жатышат. Алар 2013-жылдагы парламенттик шайлоо бурмаланган деп айыптоодо. Өкмөт башчы Наваз Шариф кызматтан кетпей турганын айткан.
