Кыргыз-казак чегиндеги талашка түшкөн Чоң-Шынаа аймагы илгертен эле Казакстанга таандык. Бул тууралуу өкмөттүн чек ара маселелери боюнча атайын өкүлүнүн катчылыгынын эксперти Аскар Момбеков “Азаттыкка” билдирди.
- Эки өлкөнүн келишиминде бул жер Казакстандыкы деп жазылып турат. Келишим 2001-жылдын 15-декабрында кабыл алынып, 2008-жылдын 24-апрелинде ратификацияланган. Эки өлкө ортосунда мындан башка келишим жок. Бул макулдашуу 1930-жылдагы картага таянат, - деди Момбеков.
Кечээ Көк-Сай айылынын тургундары Бишкекте маалымат жыйын куруп, Чоң-Шынаа аймагындагы 4515 гектар жер казак тарапка мыйзамсыз өтүп кеткенин айтып чыгышкан.
Эске салсак, 2001-жылы эки өлкө аталган жердеги 2744 гектар жерди алмашуу боюнча макулдашкан. Бирок жергиликтүү элдин каршылыгынан улам аталган келишим 2011-жылы жокко чыгарылган. Ушуга байланыштуу учурда чек ара белгилери кайрадан 2001-жылдагы калыбына келтирилип жатат.
Жер алмашууга каршы чыккан көксайлыктар июнь айында коңшу өлкөнүн Жамбыл облусуна кетчү сууну 11 күн бууп турушкан.(UEz)
