Бүгүн Баткендин Ак-Сай айылында Кыргызстан менен Тажикстандын өкмөт өкүлдөрү жолугуп, чек арада талаш жаратып келаткан айланма жолдордун курулушуна катышат. Кыргыз тараптан вице-премьер-министр Абдырахман Маматалиев башында турган кишилер, Тажикстандан өкмөт башчынын орун басары Муродали Алимардон баштаган расмийлер келет. Бул тууралуу өкмөттүн басма сөз кызматы кабарлады.
Тараптар Көк-Таш– Ак-Сай – Тамдык жана Исфара – Ворух жолунун курулушуна жеринен күбө болушат. Ошондой эле Лейлек районундагы Кулунду – Максат жолунда эки көпүрөнүн курулушу да башталат.
Быйыл жыл башынан бери Көк-Таш – Ак-Сай – Тамдык жолунун курулушуна тажик тарап каршы чыгып, чек арада бир канча жолу жаңжал катталган. Өкмөттөр аралык ондон ашуун жолугушуулар болуп, августтун аягында тараптар жолдорду куруу боюнча макулдашкан. (SE)