Базар-Коргон районуна караштуу Арстанбап айылындагы Бел-Терек орто мектебинде 230 окуучу авариялык абалдагы имаратта билим алууда.
Бул тууралуу мектептин окуу бөлүмүнүн башчысы Кубаныч Кабыланов билдирди.
- Мектеп имараты 1960-жылы ашар жолу менен курулган. 2006-жылы адистердин бүтүмү менен жараксыз деп табылган. Бирок башка мектеп жоктугуна байланыштуу балдар мына урайт деген имаратта окуп жатат, - деди Кабыланов.
Айыл тургуну Сүйүн Каназаров суук түшкөндөн тартып ата-энелер балдарын коопсуздук чараларына байланыштуу мектепке жөнөтпөй тургандыгын айтат.
Аймакта 250 түтүн калк бар, мектеп район борборунан 50 чакырым аралыктагы тоолуу өрөөндө жайгашкан. (RsK)
