Орусиянын улуттук акчасы кайрадан арзандады. Бүгүн бир доллар 38,96 жана бир евро 49,65 рублга сатылууда. 12-сентябрда АКШ жана Европа биримдиги Орусияга каршы санкцияларды кабыл алып, бир катар банктар менен энергетика, коргоо секторунда иш алып барган фирмаларды “кара тизмеге” киргизишкен. Батыш Москва Украинанын чыгышындагы ок атышпоо келишимин урматтаса жана аскерлерин кошуна өлкөдөн чыгарып кетсе, жазалоочу чаралар алынарын айтып келет. Киев Москва аскерлерин орусиячыл жикчилдерди колдоо үчүн жөнөткөн деп ырастоодо. Орус бийлиги муну четке кагууда.
