Эртең Австрия, Польша жана башка ондогон өлкөлөрдөн келген даректүү тасмаларды тарткан режиссерлор Бишкектеги жогорку окуу жайларда билим алган студенттерге сабак өтүшөт. “Бир дүйнө – Кыргызстан” фестивалынын алкагында Бишкекке келген режиссерлор студенттер менен адам укуктары, маданият жана тасмалар тууралуу баарлашат. Бул тууралуу “Азаттыкка” аталган фестивалдын уюштуруучусу Төлөйкан Исмаилова билдирди.
7-октябрдан тарта Бишкекте адам укуктарына арналган “Бир дүйнө - Кыргызстан” – даректүү тасмалардын сегизинчи эл аралык фестивалы башталат. Быйылкы иш-чарада да адаттагыдай чет элдик жана улуттук тасмалар кошулуп, жыйырмадай фильм көрсөтүлөт. (ZMa)
