Египет бийлиги түндүктөгү Синай аймагынын айрым райондоруна үч айлык өзгөчө кырдаал киргизди. Мындай чечим 24-октябрдагы эки жолку кол салуудан 33 коопсуздук кызматынын өкүлдөрү мерт кеткен соң кабыл алынды. Полициянын маалыматы боюнча, 30 адам аймактын түндүгүндөгү Ал-Харуба районундагы жардыруудан каза тапкан. Андан бир нече саат өтпөй Газа тилкеси менен чектеш Ал-Ариш аймагындагы бекетте полицияга согушкерлер ок ачып, төрт киши мерт кетти.
Аналитиктер муну акыркы учурдагы эң кандуу кол салуу деп аташты.
Мурдагы президент Мухаммед Мурси 2013-жылы бийликтен кулатылгандан бери полиция жана аскер кызматкерлерине болгон кол салуулар күчөп келет.
Өткөн жылдын 4-июлунда болгон мамлекеттик төңкөрүштөн кийин Мурсини колдогон “Мусулман агайындар” кыймылына тыюу салынып, миңдеген жактоочулары камакка алынып, бир нечеси өлүм жазасына тартылган.
