Бул тууралуу “Кыргызалтын” ишканасынын президенти Токон Мамытов “Азаттыкка” кабарлады. Анын айтымында Канада соту бир жумадан бери Куттуу-Сай кени боюнча Кыргызстандын доо арызын карап жатат.
- Сот качан бүтөрү белгисиз. Кудай буюрса чечим биздин пайдабызга болот деген ишеним чоң. Ал жакта биздин кызыкчылыкты өкмөт жалдаган эл аралык юристтер коргоп жатат, - деди Мамытов.
Буга чейин Кеминдеги сейрек кездешүүчү элементтердин Куттуу-Сай кени боюнча Stans Energу компаниясынын арызын караган Москва соода-экономикалык палатасынын алдындагы арбитраж кыргыз өкмөтүн 118 млн. долларга доого жыккан. Ал чечимдин негизинде Канаданын Онтарио соту Кумтөр долбоору боюнча Кыргызстандын 60 пайыздык акциясын камакка алган. (UEz)
