Швейцариянын Цюрих шаарында жума күнү кечинде 200гө чукул беткапчан адамдар башаламандык уюштурган. Алар колдоруна темир союлдарды кармап, көчөдөгү автоунаа, бак-дарак, таштанды челектерди өрттөшкөн.
Жаалдангандарды токтотуу үчүн чыккан шаардык полициянын жети кызматкери жараат алды. Беткапчандар полицияга каршы май куюлган бөтөлкө ыргытышкан. Бул тууралуу жергиликтүү ЖМКлар жазып чыгышты.
Маалыматка ылайык, калайман ызы-чуу уюштургандардын төртөө кармалган. Алдын ала иликтөөгө ылайык бул башаламандыкты радикал солчулдар уюштурганы айтылууда. Учурда тополоңдо талкаланган чыгым жүз миң евро деп бааланды. (TSh)
