Москвада "Центерра Голд" компаниясы менен кыргыз өкмөтүнүн ортосунда үч күндөн бери уланып жаткан Кумтөр боюнча сүйлөшүү 19-декабрда аяктады. Бул тууралуу “Азаттыкка” “Кыргызалтын” ишканасынын жетекчиси Токон Мамытов билдирди.
Токон Мамытов сүйлөшүүлөрдөн кийин айрым маселелер алдыга жылганын бирок, дагы эле талаштуу жагдайлар көп экенин айтты.
Сүйлөшүүгө аталган мекеменин жетекчи орун басары, эксперттер, Кыргызстан жалдаган эл аралык юристтер катышууда. Сүйлөшүү DLA Piper эл аралык укуктук компаниясынын Москвадагы кеңсесинде телекөпүрө форматында өттү.
Жогорку Кеңеш быйыл жыл башында Кумтөр боюнча үлүшү теңме-тең бөлүнгөн шартта биргелешкен ишкана түзүү келишимин жактырган. Кыргыз өкмөтү биргелешкен ишкана декабрда түзүлөт деп убада кылган. Кийинчерээк анын мөөнөтүн 1-мартка чейин узартууну парламенттен суранган. (TSh)