Бул тууралуу Кыргызстандын Тышкы иштер министрлигинен кабарлашты. Кыргызстандын Орусиядагы элчилигине Москва атайын расмий нота жиберип, Орусияга кирип чыгуу шарттары мурдагыдай эле кала турганын маалымдаган. Атап айтканда, Орусиянын аймагына кирип-чыгуу жана транзиттик каттам менен жүрүү, бир орундан экинчи орунга баруу жана чек араны басып өтүүдө колдонулуучу документтер өзгөрүлбөйт. Мурдагыдай эле Кыргызстандын ички (ID-card) жана жалпы жарандык (чет элдик) паспортторун колдонуп, жүрүүгө болот. Ал эми жашы жетпеген балдар үчүн туулгандыгы тууралуу күбөлүгү менен Кыргызстандын жарандыгын тастыктоочу справкасы болушу зарыл.
Буга чейин коомчулукта 2015-жылдан баштап, Орусияга кирип-чыгуу шарты өзгөрүп, катаалдашат деген кептер айтылып жаткан болчу. (TSh)
