Рейтер маалымат агенттиги Пакистан жана Ооганстандагы бюросунун башчысы Мария Головнина Исламабадда белгисиз жагдайда каза болгонун кабарлады. 34 жаштагы Головнина 23-февралда бюро кеңсесинде эс-учун билбей жыгылып, ооруканага жеткирилген. Бирок дарыгерлер анын өмүрүн сактай албай калышты.
Мария Головнина Рейтерде 2001-жылдан бери иштеп келген. Ал буга чейин агенттиктин Токио, Лондон, Москва, Ооганстан жана Ирактагы кеңселеринде иштеген.
2013-жылы болсо Головнина Рейтердин Пакистан жана Ооганстандагы кеңсесинин жетекчиси болуп дайындалган. Учурда журналисттин өлүмү боюнча тергөө башталды.
