Ошту айланып өтүүчү жолдун курулушуна даярдык катары Ош шаарынын Амир Темир кичи шаарчасындагы 170 үйдүн кызыл сызыктан чыккан бөлүгү сүрүлө баштады. Бул тууралуу Ош шаардык мэриясынан бүгүн кабарлашты.
Учурда Ош шаардык бийлиги Ошту айланып өтүүчү жолдун долбоорун даярдап жатат. Ага ылайык, Баткен тараптан келген унаалар калааны аралабай, Оштун түштүк тарабы аркылуу шаарды айланып, Бишкек же Эркечтам багыты боюнча кете алышат. Учурда айланма жолдун курулушуна шаар бийлиги инвестор издөөдө. Долбоор Ош шаарын өнүктүрүү планына да кирген.(YI)
