Жеңүүчү Канаданын гимни ойноло электе муз талаасын таштап кеткени үчүн Орусиянын хоккейчилери Эл аралык хоккей федерациясы тарабынан жазаланышы мүмкүн. Федерациянын жетекчиси Рене Фазел мындай жүрүм-турумду кабылдоого болбой тургандыгын белгилеп, «кандайдыр бир жаза колдонулат» деди. 17-майда Прагадагы беттешүүдө Канада Орусияны 6-1 эсеби менен утуп алган эле. Оюн бүтүп, күмүш медалдары тапшырылгандан кийин, орусиялык хоккейчилердин көбү аренадан чыгып кеткен. Орусиялык федерациянын башчысы Владислав Третяк хоккейчилер «уюштуруу жаатындагы калпыстыктан улам» кетип калышканын билдирди.
