Багдаддын борбордук бөлүгүндө автоунааларга орнотулган бомба жарылып, кеминде 10 киши каза таап, 30га жакыны жараат алды. Жардыруу кымбат баалуу мейманканалардын жанында 28-майдын түнүндө болгон.
Азырынча бул чабуулга жоопкерчиликти эч ким ала элек. Бирок “Ислам мамлекети” тобунун согушкерлери чабуулдарды байма-бай уюштуруп келет. Алгач бомба АКШ элчилигинин имараты тараптагы Babylon отелинин жанында, кийинкиси Cristal Grand Ishtar мейманканасынын жанында жарылды.
Сунни экстремисттери 2010-жылы Babylon жана Sheraton мейманканаларына чабуул коюп, 36 киши мерт кеткен. Багдадда коопсуздук чаралары күчөтүлгөнү менен Ирак бийлиги экстремисттик согушкерлердин чабуулдарына туруштук бере албай келет.
