Йемендин Таиз шаарындагы түрмөдөн 30-июнда 1200дөй киши качып кеткенин, арасында “Ал-Каида” уюмуна мүчө деген шек менен камакка алынгандар да бар экенин жергиликтүү булактар кабарлады. Андан мурдараак “Ал-Каиданын” мүчөлөрү түрмөгө чабуул жасап, күч кызматкерлери менен салгылашкан.
Йеменде куралдуу кагылышуулар башталганына бир жылдай болду. Быйыл март айында хусит козголоңчулары өлкөнүн көп бөлүгүн ээлеп алып, президент Мансур Хади Эр-Риядга качууга мажбур болгон. Андан бери Сауд Арабия баштаган коалиция Йеменге абадан сокку урууну улантууда. (SE)
