Мамлекеттик каттоо кызматы парламенттик шайлоого Жапониядан келген техникалык жабдуу менен иштөөнү операторлорго үйрөтүп жатат. Каттоо кызматынын маалымат катчысы Элзат Кыдырмышеванын “Азаттыкка” билдиришинче, учурда Ош жана Жалал-Абаддагы шайлоо участкаларында кызмат кылчу 35 оператор шайлоо техникасы менен таанышууда.
Кыдырмышева кошумчалагандай, окуудан өткөн операторлор облустарга барганда башка шайлоо участокторундагы операторлорго шаймандардын өзгөчөлүгүн үйрөтөт. Окуу курстары 29-августка чейин уланып, бардык облустарды камтыйт.
Буга чейин Ысык-Көл жана Таластан 45 оператор борборго келип, үйрөнүп кеткен.
4-октябрдагы парламенттик шайлоодо өлкө боюнча 7 миңден ашык оператор кызмат кылмай болууда. (SDz)
