Премьер-министр Темир Сариев бүгүн Бишкек – "Манас" эл аралык аэропорту унаа жолун оңдоо иштери менен таанышты. Өкмөт башчы бул жолдун өлкө үчүн мааниси чоң экенин белгилеп, аны өз мөөнөтүндө жана сапаттуу бүткөрүү зарылдыгын билдирди.
- Бул борбор шаарыбызга киргендеги негизи жана мамлекеттик маанидеги жол. Аны оңдоодо комплекстүү түрдө иш алып барып, жергиликтүү бийлик жолдун эки тарабын көрктөндүрүүгө көңүл бурушу керек, - деди Темир Сариев.
Транспорт жана коммуникациялар министрлигинин маалыматы боюнча, узундугу 24 чакырымды түзгөн жолду оңдоо 954 миллион сом деп бааланып, акча бөлүнүп берилүүдө. Учурда иш толук жүрүп жатат. Аны 2016-жылдын 20-августуна чейин бүткөрүү пландалууда.
Мындан соң премьер-министр “Манас” эл аралык аэропортунда жайгашкан “Кыргызаэронавигация” мамлекеттик ишканасына караштуу жаңы аэронавигациялык мунаранын абалы менен таанышты. Аны ишке берүү жараянын тездетүү жана коопсуздугуна өзгөчө көңүл буруу тапшырмасы берилди. (RK)
