Европа биримдиги Баку сотунун укук коргоочу активисти Ариф Юнусту саламаттыгына байланыштуу үй камагына чыгаруу чечимин кубаттап, муну "позитивдүү гуманитардык ишара" деп атады.
Биримдик 13-ноябрда жасаган билдирүүдө мындан ары да оң кадамдар жасаларына үмүттөнөрүн белгиледи. Анда ошондой эле шаркеттин Азербайжан менен «терең жана кеңири диалог» жүргүзүүгө даярдыгы айтылат. Юнус 2014-жылы Армениянын кызыкчылыгына тыңчылык кылган деп камалган. Ушул августта экономикалык кылмыштар үчүн айыпталып, жети жылга кесилген. Жубайы Лейла ошол эле айыптар боюнча 8 жарым жылга эркинен ажыратылган. Алардын сот ишин эл аралык укук коргоо уюмдары куугунтук катары баалашууда.
Ариф Юнус түрмөдөн кое берилердин алдында өлкөдөн чыкпайм деген тил катка кол койду.
