Кыргыз менен казактын айтыш өнөрү ЮНЕСКОнун материалдык эмес маданий мурастар тизмесине кирди. Бул эл аралык уюмдун маалымат кызматы мындай чечим 2-декабрда Намибиянын Виндхук шаарында өткөн маданий мурастарды коргоо комитетинин жыйынында кабыл алынганын кабарлады.
Айтыш - кыргыз жана казак элдеринде кеңири тараган төкмө акындардын ыр таймашы. Кыргызстанда айтыш өнөрү соңку жылдары кайра жанданып, "Айтыш" фондунун колдоосу менен төкмө акындардын жаңы мууну өсүп-жетилди, бир канча жаңы ысымдар пайда болду.
ЮНЕСКОнун аталган тизмесине буга чейин Кыргызстандан Оштогу Сулайман тоо, “Манас” үчилтиги, шырдак, ала кийиз жана тарыхый аталыштагы байыркы Суяб, Баласагын шаарлары кирген.
