Адам укугуна арналган “Бир дүйнө - Кыргызстан” деген аталыштагы даректүү фильмдер фестивалынын тогузунчу айлампасы ушул жумада башталат. Иш-чаранын ачылышы 10-декабрда болот. Фильмдер 14-декабрга чейин Бишкекте көрсөтүлүп, андан ары аймактарда уланат.
Быйыл 18 чет элдик, 4 жергиликтүү фильм тандалган. Алардын бардыгы аялдар жана балдардын укугу тууралуу тартылган тасмалар. Бул тууралуу аны уюштуруп жаткан “Бир дүйнө - Кыргызстан” уюмунун өкүлү Аскер Сакыбаева “Азаттыкка” билдирди.
Быйылкы фестивалда Маданият, маалымат жана туризм министрлиги расмий өнөктөш катары катышууда. Фильмдерди тандоого министрликте, социалдык кызматтарда иштеген өкүлдөр жана укук коргоочулар катышты.
Фестивалдын алдында, 8-9-декабрь күндөрү Бишкекте адам укуктарына арналган үч тегерек үстөл уюштурулат. (SE)
