Москванын Украинанын ички ишине кийлигишүүсүнө байланыштуу Европа биримдиги кабыл алган санкцияларды Владимир Путин “абсурд” деп атады. Германиянын “Билд” журналына 11-январда жарыяланган маегинде Путин, “Европа биримдиги санкциялар менен эмнеге жетишти? Эч нерсеге жетишкен жок. Ал абсурд театры” деди.
Ошол эле учурда Путин санкциялар Орусиянын эл аралык финансылык базарга кирүүсүнө тоскоолдук жасап жатканын, бирок орус экономикасына олуттуу зыян Орусия экспорттогон мунай, газ жана башка чийки заттарга баанын түшүүсүнөн келип жатканын белгиледи. Интервьюда орус президенти Крым Орусияга “демократиялык жолдор” менен кошулду деп билдирди.
Крымда референдум Орусиянын куралдуу күчтөрүнүн көзөмөлүндө өткөрүлүп, ал Бириккен улуттар уюмунда 100дөн ашуун мамлекет тарабынан мыйзамсыз аракет катары бааланган. (AiT)
