Европа кеңешинин парламенттик ассамблеясынын төрайымы Анн Брассёр Москва 25-январга белгиленген кышкы сессияга катышуудан баш тартканын уюм өкүнүү менен кабыл алганын айтты. Кышкы сессия Франциянын Страсбург шаарында 25-январда өтөт. Брассёр дүйшөмбү күнү Орусия парламентинин кош палатасынан сессияга катышуудан баш тартуу боюнча кат келгенин билдирди.
Орус тарап 2014-жылы Европа кеңешинин парламенттик ассамблеясында добуш берүү укугунан ажыратылган. Буга Крымдын аннексияланышы негиз болгон. 2015-жылы Орусияга киргизилген санкциялардын мөөнөтү узартылган соң Москвадан барган делегация Страсбургдагы сессиядан чыгып кеткен. Орусия парламентчилери андан берки жыйындарга бойкот жарыялап келет. (SE)
