Кыргыз Эл акыны, Токтогул сыйлыгынын ээси, белгилүү акын Сооронбай Жусуевди акыркы сапарга узатуу тажыясы бүгүн Токтоболот Абдумомунов атындагы кыргыз драма театрында өтүп жатат. Акын менен коштошууга мамлекеттик жетекчилер, депутаттар, акын-жазуучулар жана башка коомчулук өкүлдөрү катышууда. Маркумдун сөөгү Ала-Арча көрүстөнүнө коюлат.
Эл акыны Сооронбай Жусуев 4-февраль күнү, 91 жаш курагында дүйнө салган.
Президент Алмазбек Атамбаевдин буйругу менен мамлекет башчынын фондунан Сооронбай Жусуевдин үй-бүлөсүнө материалдык жардам катары 100 миң сом бөлүнгөн.
Сооронбай Жусуев 1925-жылы 15-майда Кара-Кулжа районундагы Кызыл-Жар кыштагында төрөлгөн. Айыл мектебин бүтөрү менен 18 жашында армияга кетип, Панфилов атындагы 8-гвардиялык дивизияда кызмат өтөгөн. Алгачкы «Эмгек күүсү» аттуу ыр жыйнагы 1950-жылы басмадан чыккан. Андан бери акындын 30дан ашык китеби кыргыз тилинде, 14 китеби орус тилинде жарык көргөн.(ZA/ZKo)
