Кыргызстандын 2016-жылдагы футбол боюнча Суперкубогу үчүн беттеш 5-мартта Ош шаарындагы Акматбек Сүйүнбаев атындагы стадиондо өтөт. Кыргызстандын футбол лигасынан билдиришкендей Суперкубок үчүн 2015-жылдагы Топ-лиганын чемпиону Оштун “Алай” клубу менен 2015-жылдагы Кыргызстандын кубогунун ээси Канттын “Абдыш-Ата” клубу беттешет. Оюн 15:00дө башталат.
Кыргызстандын Суперкубогу футбол сезонунун ачылышына арналган жыл сайын өткөрүлө турган мелдеш болуп саналат. 2011-жылдан бери өткөрүлүп келе жаткан бул турнирде кубокту жогоруда аталган клубдар жеңишке жетишкен эмес. Мелдеш алгачкы жолу өткөрүлгөндө бул кубокко Кочкор-Атанын "Нефтчи" клубу ээ болгон. Андан кийин үч жолу катары менен Бишкектин "Дордой" клубу алган. 2015-жылы Суперкубок үчүн беттеш болгон эмес. (ECh)
