Бишкек шаардык милициясы №42 мектепте бомба бар деген маалыматтан улам окуучуларды эвакуациялады. Бишкек ШИИБнын маалымат катчысы Олжобай Казабаевдин “Азаттыкка” билдиришинче, маалымат болжол менен саат 11:30да түшкөн.
- Чалган адам өзүн тааныштырбастан, мектепте бомба бар деп айткан. Учурда ыкчам-тергөө иштери жүрүүдө. УКМК тарабынан сапёрлордун келишин күтүп жатабыз, – деди Казабаев.
Маалым болгондой мектептин тегереги толугу менен курчоого алынып, окуучулар алыс аралыкка чыгарылды.
№42 мектеп Бишкектин Сокулук району менен чектеш жерде жайгашкан.
