Мамлекеттик чек ара кызматы кыргыз-өзбек чегинде абал тынч экенин билдирип, өзбек тарап такталбаган тилкеге жол куруп жатат деген маалыматты төгүндөдү. Мекеменин маалымат катчысы Сажира Чоколоеванын “Азаттыкка” ырасташынча, Ала-Букадагы чек ара отряды кадимки режимде иштеп жатат.
Мындан мурдараак Ала-Бука районундагы Көк-Таш айыл өкмөтүнө караштуу Арап айылына жакын такталбаган тилкеге өзбек тарап унаа жолун куруп жатканын жергиликтүү кеңеш депутаттары “Азаттыкка” кабарлашкан.
Көк-Таштан 18 чакырым алыс жайгашкан Арап айылында 150гө жакын түтүн жашайт. Ал жерде Кыргызстан менен Өзбекстандын ортосунда 19 миң гектардан ашык такталбаган жер бар.(UEz)