Баткен облусунан Бишкек шаарына жол тартып бараткан кичи автобустагы кыргыз айдоочусу менен 22 тажик жаранын ок атуучу курал колдонуу менен коркутуп, тоноп кеткен топ камалды. Бул тууралуу Жалал-Абад облустук ИИБнын басма сөз кызматы билдирет.
Маалыматка караганда, 9-апрель күнү Ош-Бишкек трассасынын 426-чакырымында тажик жарандары бараткан кичи автобусту Мерседес-Бенц 270Е үлгүсүндөгү унаа менен келген төрт жаран коркутуу жолу менен тоноп кетишкен. Айдоочудан 150 миң сом, тажик жарандарынан 59 миң рубль, 2 миң казак тенгесин жана 9 уюлдук телефондорун тартып алышкан. Бул багытта кылмыш иши козголуп, издөө иштеринин натыйжасында 23-24 жаштардагы Ош жана Жалал-Абад облустарынын тургундары камалып камакка алынды. Учурда тергөө иштери уланууда. (RsK)
