Армениядагы орус элчилигинин алдында кечээ Орусиянын кошуна Азербайжанга курал-жарак сатышын айыптаган нааразылык акциясы өттү. Ага жүздөгөн адам катышып, бул курал сатуу Тоолуу Карабакта 2-апрелдеги кагылышка алып келгенин белгилешти.
Акырында Орусия Азербайжанга курал сатуусун токтотууну талап кылган кайрылуу кабыл алынды.
Белгилүү болгондой, Армения Орусия баштаган Евразия экономикалык биримдигине жана ЖККУга мүчө.
Орусия Азербайжанга 2009-2011-жылдардагы келишим боюнча жалпы суммасы 4 миллиард долларга тете курал-жарак жана аскер техникаларын саткан.
Орус премьери Дмитрий Медведев өткөн жумада Ереван сапарында Азербайжан менен келишимди коргоп, Москва чырлуу аймактагы аскерий тең салмактуулукту сактоо аракеттерин күчөтөрүн айткан.
Тоолуу Карабакта 2-апрелде тутанып, төрт күнгө созулган уруш ондогон адам өмүрүн алды.