Иран АКШда камакка алынган Борбордук банкынын каражатын чыгаруу үчүн Гаагадагы эл аралык сотко кайрылат. Бул тууралуу Ирандын президенти Хасан Роухани 10-майда билдирди.
- Биз жакынкы убакытта бул ишти Гаага сотуна жеткиребиз. Бул каражатты АКШнын оңой-олтоң ээлик кылышына жол бербейбиз,- деди Роухани.
20-апрелде АКШнын Жогорку соту америкалык банкта кармалып турган Ирандын 2 миллиард долларын Тегерандын тиешеси бар делген жардырууда каза болгондордун жакындарына кенемте катары төлөп берүүгө милдеттендирген. Сөз 1983-жылы Бейрутта америкалык аскер базасына чабуулда каза болгондор жөнүндө болуп жатат.
Бирок Иран АКШ сотунун мындай чечимине макул эместигин билдирип келет.
