Ирак баш калаасында бүгүн катар жардыруулар болуп, андан бери дегенде 54 киши жашоо менен кош айтышты. Полиция 100дөн ашуун адам жарат алганын кабарлады.
Жардыруулардын бири шиит агымындагылар жашаган Ал-Шааб конушундагы базарда болду. Анын артынан Ал-Рашид конушунда бомба коюлган унаа жарылды. Арадан бир аз убакыт өтүп Садр районунда да автоунаа жарылды.
Ал-Шаабда болгон жардырууну “Ислам мамлекети” экстремисттик тобу уюштурганы маалым болду.
Иракта 11-майдан бери дээрлик күнүгө жардыруулар болуп, ага жоопкерчиликти “Ислам мамлекети” экстремисттик тобу алууда. Топтун билдирүүлөрүндө мусулманчылыктын шиит агымын колдогондор бутага алынып жатканы айтылат.
