Линктер

ЧУКУЛ КАБАР!
29-Март, 2024-жыл, жума, Бишкек убактысы 20:44

Эралиев менен коштошуу зыйнаты Кыргыз академиялык драма театрында өтөт


Эл акыны менен президент Алмазбек Атамбаев. 8-май, 2013-жыл
Эл акыны менен президент Алмазбек Атамбаев. 8-май, 2013-жыл

Кыргыз эл акыны, Кыргыз Республикасынын Баатыры Сүйүнбай Эралиев менен коштошуу зыйнаты эртең, 18-июлда Кыргыз академиялык драма театрында өтөт. Митинг-реквием саат 10:00дө башталат.

Акындын сөөгү Ала-Арча көрүстөнүнө коюлат.

Сүйүнбай Эралиев кечээ, 16-июлда 95 жашында дүйнө салды.

Ал 1921-жылы Талас районундагы Үч-Эмчек айылында туулган. Акындын ырлары 1939-жылдан тарта жарыялана баштаган. Алгачкы жыйнагы «Биринчи жаңырык» деген ат менен 1949-жылы жарык көргөн. Эралиев кыргыз поэзиясында биринчи болуп эркин ыр формасын 1966-жылы жазылган «Жылдыздарга саякат» поэмасында пайдаланган.

Ал кыргыз окурмандары үчүн орус адабиятынын классиктери Александр Пушкиндин, Михаил Лермонтовдун, Александр Твардовскийдин чыгармаларын которгон.

Акын көп жыл гезит-журналдарда, жазуучулар союзунда иштеген.

1974-жылы Кыргыз эл акыны наамын алган. Токтогул атындагы мамлекеттик сыйлыктын, III жана I даражалуу Манас, “Элдердин достугу” ордендеринин ээси. 2000-жылы элдердин достугун бекемдөөгө кошкон салымы үчүн Казакстандын “Алтын көпир” эл аралык сыйлыгына татыган. 2006-жылы Кыргыз Республикасынын Баатыры наамы берилген. Акындын “Ак мөөр” лирикалык поэмасы эл арасында белгилүү.

Кыргыз тилинде 36, орус тилинде 20, башка тилдерде төрт китеби жарык көргөн. (ZA)

XS
SM
MD
LG