Түркиянын Казакстандагы элчиси Борбор Азия өлкөлөрүндө иштеп жаткан Фетхуллах Гүленди жактоочулардын мектептерине байланыштуу эскертүү жасады. Элчи Невзат Уянык “казак-түрк мектептери” деген ат менен иштеп жаткан окуу жайларга расмий Анкара эч кандай колдоо көрсөтпөгөнүн белгиледи.
“Кандай болгон күндө да бул мектептердин расмий түрк бийлиги менен байланышы таптакыр жок”, - деди элчи 29-июлда Астанада болгон басма сөз жыйынында.
Мындан мурда Түркиянын тышкы иштер министри Мевлют Чавушоглу Кыргызстандагы Гүлен мектептерин жабуу керектигин бир нече ирет эскерткен эле.
15-июлда Түркияда болгон аскерий козголоңго бийлик АКШда бозгунда жүргөн динаятчы Фетхуллах Гүленди айыптоодо. Гүлен бул айыптоолорду четке кагып келет. (BCh)
