Өзүн элдик республика деп жарыялап алган Донецк жана Лугансктын лидерлери Киев менен бардык туткундарды алмашуу тууралуу макулдашуу кабыл алынганын билдиришти. Лугансктын өкүлү Ольга Кобцева сүйлөшүү 21-сентябрда Минскте өткөнүн, жыйынтыгында макулдашууга жетишилгенин айтты.
Шаршемби күнү Украинанын Жогорку Радасынын вице-спикери Ирина Геращенко жикчилер Европадагы коопсуздук жана кызматташтык уюмунун өкүлдөрүн туткундагы украин жарандары менен жолуктурууга макулдугун бергенин айткан. Бирок ал алмашуу тууралуу эч нерсе билдирген эмес болчу.
Донбасстагы согуш 2014-жылы Орусия Крымды аннексиялап алгандан кийин башталган. (RK)
