Өкмөттүн Жалал-Абад облусундагы жаңы дайындалган ыйгарым укуктуу өкүлү Кыянбек Сатыбалдиев алгачкы пландары менен “Азаттыкка” бөлүштү. Ал алгач район, шаарлардын жетекчи, тургундары менен жакындан таанышып, инвестицияга басым жасай турганын айтып, буларды кошумчалады:
- Алдыда элдин биримдик, ынтымагына багышталган иштерди аткаруу зарыл болуп турат. Ар кандай сын айткандарга көңүл бурбастан, иш менен аларга жооп бермекчимин. Өкмөт менен тыгыз иштөө негизги тапшырмалардын бири.
Сатыбалдиев КСДПдан Жогорку Кеңештин депутаты болчу, андан мурда Майлуу-Суу шаарынын мэри болуп дагы иштеген.
Буга чейин облусту жетектеп келген Жумагүл Эгембердиева 15-сентябрда Жергиликтүү өз алдынча башкаруу жана этностор аралык мамилелер мамлекеттик агенттигине жетекчи болуп которулган.
